pachola

सख्या...

2011-06-14T02:14:00.000-07:00

माझ्या मनाचं पाखरू,
गेलं आभाळाच्या वरी,
किती मनवलं तरी,
तुझ्याशिवाय राहिना...

दूर क्षितिजावरती,
मिळे आभाळा धरती,
तशी तुझ्यावर प्रीती,
माझ्या मनात माईना...

केतकीच्या बनामधी,
जसं नादे अलगूज,
माझ्या मनातलं गूज,
कसं तुला रे कळंना...

माझ्या ओठावर गीत,
माझ्या मनामधी प्रीत,
माझ्या मनाचा तू मीत,
कसं तुला समजंना.....

सख्या...

2011-06-14T02:10:00.000-07:00

एक तुझी नजर,
एक माझी नजर,
विसर नजरेतला बहर,
आतातरी...

एक तुझी बोली,
एक माझी बोली,
विसर प्रीती अबोली,
आतातरी...

एक तुझं गीत,
एक माझं गीत,
विसर तुझी-माझी प्रीत,
आतातरी.....

कथा...

2011-05-27T10:40:00.000-07:00

नेत्र भिडता नेत्रांना, माझी नजर झुकली,

पापण्यांच्या उंबऱ्याला, माझी नजर अडली,

हलक्याशा हासण्याने, एक लहर उठली,

मूक नथीवर माझ्या, तुझी नजर अडली...

विचारिते काहीबाही, भिवयांची धनुकली,

माझ्या नजरेने गूजें, किती किती सांगितली,

ओठांच्या महिरपीवर, तुझी फिरतां अंगुली,

फिरून एक लाट, मनामधि आंदोळली...

फिरून एकवार, लाट प्रीतीची उठली,

तुझ्या ओठीच्या वेणूत, नवी गीते झंकारली,

मंद झुळूक खट्याळ, रानोवनीं लहरली,

कथा अलवार प्रीतीची, पानापानांत कोरली.....

अंगाईगीत...

2010-08-03T23:41:00.000-07:00

मीट ना गं डोळे, जागी का अजुनी?

मीट ना गं डोळे जागी का अजुनी..

स्वप्न पाहशी का जागुनी जागुनी....

लटकती मोर, राघू, चिऊ, मैना,

मंद झुलतो गं, चंदनी पाळणा,

शाल उबदार घेई पांघरोनी..

मीट ना गं डोळे, जागी का अजुनी...

नाजुक घागऱ्या चांदीच्या पैंजणा,

नाचविशी पाय नाद आला पुन्हां,

नीज गे जराशी, दमलीस राणी..

मीट ना गं डोळे, जागी का अजुनी...

शांत आकाशात चांदण्यांची दाटी,

पऱ्याही खेळती चांदोबाभोवती,

स्वप्नांच्या राज्यात तूही ये फिरूनी..

मीट ना गं डोळे, जागी का अजुनी....

(चाल: निघालो घेऊन दत्ताची पालखी-अजित कडकडे)

अंगाई...

2010-08-03T11:04:00.000-07:00

आनंदाच्या गं झाडाला,
नवी फुटली डहाळी,
तिच्यावर उमलली,
रूपकळी...

गोरुली, गोडुली,
माया-स्नेहाने माखली,
नजरेच्या पाळण्यात,
विसावली...

बघता-बघता,
सई हसाया लागली,
गालावर उमटली,
गोड खळी...

इवलीशी झोळी,
फुलां-फुग्यांनी सजली,
तिच्यामध्ये विसावली,
सोनकळी...

उगवली सांजवेळी,
साजरीशी दीपकळी,
भरो साऱ्यांचीच झोळी,
प्रकाशाने...

किती किती बोलवाल,
तिला छकुली, सोनुली,
नाव द्या ना छानदार,
शुभ वेळी...

आता यावे गं आत्याने,
नाव कानात सांगावे,
शुभ आशीर्वच द्यावे,
पणजीने.....

सख्या...

2010-04-16T11:02:00.000-07:00

नाव कोरले नक्षीत,

लाली रंगली रेषांत,

रूप भरले मनात,

मेंदी रंगे तळव्यात....

स्वप्न तरळे नेत्रांत,

तुझी प्रतिमा चित्रात,

लाज लाजते मनात,

गालावरच्या खळीत....

सखा येतसे स्वप्नात,

स्वप्नातल्या कहाणीत,

कधी येशी रे सत्यात?

प्राण साठले डोळ्यात.....

वाट....

2010-03-30T23:11:00.000-07:00

माडांची मांदियाळी,

विसावलो तरुतळीं,

पायांखाली हुळहुळे,

मऊ वाळू सोनसळी...

वेणीवर माळलेली,

मऊ-मख्मली अबोली,

झळ लागता उन्हाळी,

जरा-जराशी सुकली...

भाळावरती सखीच्या,

नक्षी थेंबांची दाटली,

गडे, धराया सावली,

एक झावळी झुकली...

स्वप्नाचिया मृगजळीं,

लाट उठली, विरली,

वाट माडांच्या मधली,

माडांतच हरवली.....

वाट....

2010-03-29T23:56:00.000-07:00

खाचा-खळग्यांची वाट,

एकटीच चालले,

जमीन जास्त भेगाळलेली,

की त्याहून जास्त, पावले?.....

गारूड...

2010-03-29T09:45:00.000-07:00

कुंकवाच्या चिरीखाली,

तुझ्या भाळीचं गोंदण,

जेव्हां मधुर हासतं,

तेव्हां माझ्या मनावर

तुझं गारूड पडतं...

तुझं सोन्याचं कंकण,

गर्द हिरव्या चुड्याशी,

जेव्हां गुंजन करतं,

तेव्हां माझ्या मनावर

तुझं गारूड पडतं...

तुझ्या डोळ्यातलं तेज,

नथीतल्या मोतियाशी,

जेव्हां स्पर्धा गं करतं,

तेव्हां माझ्या मनावर

तुझं गारूड पडतं...

तुझी शांत नेत्रज्योत,

जेव्हां निरांजनासवें,

सखे, तेवे गं निवांत,

तेव्हां माझ्या मनावर

तुझं गारूड पडतं.....

सखे...

2010-03-20T03:06:00.000-07:00

रुसुनी तू गेलीस तेव्हां, जलधार कोसळत होती,

अपमानित नेत्रीं माझ्या, आसवेही तरळत होती..

दूर दूर रस्त्यावरती झाडेही निथळत होती,

अन स्वप्नांची रांगोळी, पाण्यात विरघळत होती....

अन तीव्र लहर वाऱ्याची छेडिता पारिजाताला,

शाल शुभ्र, खांद्यावरुनी, हळुवार ओघळत होती....

घनगर्द, सांवळ्या मेघां, बिजलीने कातरताना,

वेदनाच जणू मेघाची, जलरुपीं कोसळत होती....

माझ्याही मनांतरी सखये, अशी स्मृतिवृष्टी होताना,

दूरात मनाच्या क्षितिजीं, चंद्रकोर उजळत होती....

वळवाचा पाऊस...

2010-03-19T06:32:00.000-07:00

वळवाचा पाऊस बरसला, जरा जरासा..

ढगाआडचा सूर्यही भिजला, जरा जरासा..

जरतारी अंगरखा भिजला, जरा जरासा..

उडे पितांबर वारयावरती जरा जरासा....

माथ्यावरचा पदरही भिजला, जरा जरासा..

कुरळ कुंतला वारा उडवी, जरा जरासा..

भांगातील सिंदूर विखरला, जरा जरासा..

मावळतीच्या भाळी रक्तिमा, जरा जरासा....

पक्ष्यांचा कलरवही वाढला, जरा जरासा..

सजणाला का उशीर जाहला, जरा जरासा..

नदीपात्राचा धूरट आरसा, जरा जरासा..

रात निरखिते रूपचंद्रमा, जरा जरासा...

पाऊस...

2010-02-28T10:28:00.000-08:00

तु आणि मी..

भिजत होतो दोघेही..

पण तुझा पाऊस वेगळा होता,

नि माझाही पाऊस वेगळाच ....

पाऊस झरताना माझ्या देहातून

नाना सुरावटी उलगडत होत्या...

अन तुझ्या कोटा वरुन,

पाऊस तसाच कोरडा,

झरून जात होता....

तुला न भिजवता......

share...

2009-04-11T23:37:00.000-07:00

A joy does not become real,
until you share it,
with someone dear..
A joy, so small,
like blooming of a May-flower,
or a star blinking for a moment,
and rushing down to the earth...

Share a tear,
and it becomes a dew-drop,
perching on a blade of the green grass..
and blowes the soft wind,
warm and damp, like a breath,
of a waiting lover......

सख्‍या...

2009-04-11T11:29:00.000-07:00

आपली, आपली म्‍हणताना,
माणसे दुरावत गेली,
आली, आली म्‍हणताना,
सांज ढळत गेली..

बघता-बघता मातीची,
नाळ तुटत गेली,
घट्‍ट धरलेल्‍या हातातून,
बोटे सुटत गेली..

न कळलेली, नात्‍यांची,
कोडी सुटत गेली,
वरवरची, चमकदार,
बेगड उडत गेली..

तुझी वाट पाहता-पाहता,
पापणी शिणत गेली,
सारा अंधार दाटताना,
आशाही मावळत गेली....

सख्‍या...

2009-04-11T11:12:00.000-07:00

हास्‍य जरि ओठात माझ्‍या,
हास्‍य ते ना अंतरी,
जाणिशी ना तू मनीं?...

रंग तू काही दिले,
रंग मी माझे दिले,
परि चित्र ना ते रंगले...

दीप प्रीतीचे सख्‍या रे,
कापरासम क्षणिक जळले,
काही न मागे राहिले...

वाट स्‍वप्‍नांची सुगंधी,
गर्द हिरवी, मखमली,
अन्‌,उमलली प्रीतीफुले...

चालु जाता मी सुखाने,
हाय,हिरवाळीतुनी,
किती डंख पायी लागले...

यातनांनी पोळलेल्‍या,
पावलांना नि मनाला,
प्रेम कधि ना लाभले....

साखळी हायकू...

2008-09-20T01:19:00.000-07:00

साखळी हायकू
मागच्या आठवड्यात संवेदनी काव्यमय खो खो सुरु केला. सागरनी सुमेधाच्या कवितेवर कवितारुपी प्रतिक्रिया धाडली आणि या सगळ्यातून साखळी हायकूची (हाईकूची?) कल्पना तिला सुचली.

"साखळी हायकू"साठी नियम:
१) खाली दिलेल्या सुमेधाच्या हायकूप्रमाणे तीन ओळींचा (की ओळींची?) हायकू रचायचा.
२) त्यातील मात्रा, ताल, ध्वनीरुप तसंच्या तसं आलं तर उत्तम. शक्य तितकं साम्य राखायचा प्रयत्न करायचा.
३) सर्वात महत्त्वाचे, ही साखळी असल्यामुळे तुम्ही जी कडी गुंफणार आहात तिची आधीच्या कडीशी काहीतरी जोडणी असावी : त्यातील लपलेल्या किंवा स्पष्ट दिसणार्‍या अर्थानुसार, त्यातील वापरलेल्या प्रतिमेनुसार, सूचित केलेल्या कल्पनेनुसार किंवा व्यक्‍त होणार्‍या भावनेनुसार किंवा अजून काही असेल!
४) कमीत कमी एक आणि जास्तीत जास्त तीन जणांना खो द्यायचा. त्यांच्या ब्लॉगवर त्यांना प्रतिक्रिया देऊन तसं कळवायचं आणि शक्य असल्यास सुमेधाच्या ब्लॉगवर तिला कळवायचं. कळवायचा हेतू इतकाच की ती सगळ्या कड्या एकत्र करू शकेल.
५) तुमच्या नोंदीच्या सुरुवातीला हे नियम डकवा, तुम्ही ज्या कडीच्या पुढे लिहीताय (ज्याच्याकडून/जिच्याकडून खॊ मिळालाय त्याची/तिची कडी) ती कडी उतरवा, आणि शक्यतो तुम्ही ज्यांना खो देताय त्यांच्या ब्लॉगचा दुवा द्या.

मला प्रशांत कडून खो मिळालाय. तो स्वीकारून त्यात माझी कडी ओवण्यापूर्वी सुमेधाच्या हायकूपासून माझ्यापर्यंत आलेली हायकूंची साखळी मी देत आहे. शेवटची हायकू माझी आहे. हायकू या काव्यप्रकाराबद्दल सईने तिच्या ब्लॉगवर छान माहिती दिली आहे. त्याचा उपयोग अवश्य करून घ्यावा.

माझ्यापर्यंत हायकूची साखळी आली आहे ती खालीलप्रमाणे:

रस्त्यातल्या फुलांचा
धुंद गंध दरवळला
मुक्कम तिथेच हरवला!
(इति सुमेधा)
जुन्या शर्टाच्या खिशात सापडली
रस्त्यावरची दोन-चार सुगंधी फुलं
माझ्या खांद्यावर डोकं ठेवून चालली होतीस कधी काळी
(इति चक्रपाणि)
कोमेजलेली फुलं
गंध तसाच कायम तरी
तुझ्या अथांग प्रेमापरी
(प्रशांत)

हायकूच्या या साखळीतली माझी कडी:

जुनं पुस्तक उघडतांच
पडला एक वाळका गुलाब
आता त्या सारखाच प्रेमांत उरला नाही आब

माझा खो मेघनाला अन् सुषमाला Labels: साखळी हायकू

साखळी हायकू ...
ही पुढची माझी कडी..
जुनं...

प्रेम जुनं, पुस्‍तकही जुनं,
जुन्‍या पुस्‍तकासारखं, मनही सुनं,
गंधाच्‍या वाटेवर, जुळतील कां पुन्‍हां, मनं?... सुषमा

sushama-karandikar.blogspot.com
email :-sushamaskarandikar@yahoo.com

आता खो कसा देऊ, ते समजत नाही...सांगा कुणी...सुषमा..

२१-९-०८ :- माझा खो हरेकृष्‍णजी ना...आणि आशा ला...

सख्‍या...

2008-08-20T23:55:00.000-07:00

अशी चालले मी, किती चालले,
किती दु:ख नेत्रांतुनी वाहिले,
किती श्रान्‍त, भेगाळली पाउले रे,
अजूनी किती चालणे राहिले..?

धरोनी तुझा हात हाती सख्‍या रे,
जणू पुष्‍पशय्‍येवरी चालले,
अचानक परि, स्‍वप्‍न ते भंगले अन्‌,
वाट्‍यास आले जिणे एकले..

संगीत ते नर्म ओठातले अन्‌,
ते भाव डोळ्‍यातले कोवळे,
किती मी स्‍मरू, अन्‌ कसे विस्‍मरू,
सख्‍या चित्र जे अंतरी कोरले..?

तिथे, पार त्‍या, दूर क्षितिजावरी रे,
नभांगण जिथे भूवरी वाकले,
तिथे नीलछायेतळी थांब प्रीतम,
निळे स्‍वप्‍न नेत्रांत सांभाळिले....

सख्‍या...

2008-07-21T23:26:00.000-07:00

जाहले, जे घडुनी गेले, त्‍यां आठवणे व्‍यर्थ आहे,
चक्र काळाचे पुन्‍हां उलटे फिरविणे, शक्‍य का रे?

मांडलेला डाव, जो उधळून दिधला तू स्‍वहस्‍तें,
त्‍यातली रंगत फिरूनी आणणे तुज शक्‍य का रे?

बांधुनी, कवटाळुनी, जखडून ठेविशी जरि अता रे,
उडुनी गेले कापरासम, रंग नात्‍यातील सारे..

वाळल्‍या कुसुमात शोधिशी रंग बरवा तू अता रे,
रंगही ना, गंधही ना, गळुनी पडले भूवरी रे....

पुन्‍हां एकदा...

2008-07-19T03:05:00.001-07:00

तू दिसलीस गं, दिसलीस तू अन् पुन्हां एकदा,
ओळखीचे स्मित उमलून आले, पुन्हां एकदा..

अंतरात नादल्या सतारी, दिडदा, दिडदा,
तीच जुनी धून ओठी आली, पुन्हां एकदा..

नाव तुझे जे, मनात जपले, किती-कितीदा,
आज अचानक ओठी आले, पुन्हां एकदा..

पाउलवाटेवरी चाललो, रमलो कितिदा,
तू आलीस, अन् दरवळली बघ, पुन्हां एकदा..

नदीतीरी बसलो जळात सोडून पाय कितीदा,
स्मृतिलहरी झंकारून उठल्या, पुन्हां एकदा..

तुलाही सारे आठवते कां, सांग एकदा,
जगेन पळभर, पुन्हां एकदा, बस्स, एकदा.....

पावसा...

2008-07-05T03:25:00.000-07:00

नको, नको रे पावसा,
आता पुरे कर जोरा,
धर माझा हात, चल,
डोंगराच्या पार जरा...

तिथे टिपूसही नाही,
नुसता वारा हा भरारा,
तिथे पाड तुझ्या धारा,
जरा भिजव झाडोरा...

तेव्हां फुटेल पानोरा,
नवा येईल फुलोरा,
आणि जमिनीची धूप,
थांबेल जरा, जरा...

तेव्हां नद्या वाहतील,
गावतळी भरतील,
जेव्हां भुका भागतील,
तेव्हां हासेल ही धरा....

सखि..

2008-06-13T04:08:00.000-07:00

ओळखीचा सूरही का बेसुरा भासे मला?
सूर कंठातीलही सोडून गेलासे मला..
आठवेना शब्‍दही समजावण्‍या तुजला सखे,
गे मूक झाले नेत्र अन्‌, अश्रूच केवळ बोलके..

बघ, वळेसर बकुळीचे गुंफीत बसलो मी सखे,
अन्‌, कल्‍पनेतच माळिले केसांत तुझिया लाडके..
पाहुनी तव लाजणे, गे स्‍वप्‍न झाले बोलके,
अन्‌, वाढवेळी भान येतां, धावलो तुजप्रति सखे..

परि वेळ टळली भेटीची, हे चांदणे झाले फिके,
अन्‌, भोवताली पसरले बघ गर्द रुसव्‍याचे धुके..
सोड ना रुसवा प्रिये, करु तरी किती मी आर्जवे?
हे दंव नव्‍हे पात्‍यांवरी सखि, सांडली मम आसवे..

मग, टाकुनी रुसवा प्रिया अशी मंद गाली हासली,
शब्‍दां-सुरांच्‍या संगतीने पाखरेही थिरकली..
एक कविता प्रीतीची, मग उमलली कलिकांसवे,
अन्‌ दंवाच्‍या संगती, गेली विरोनी आसवे....

चंद्र...

2008-06-07T11:05:00.000-07:00

त्‍या ढळत्‍या रात्री, चंद्र हासला मजला,
हा वेडा झाला, वेडा झाला, वदला....

किती प्रसन्‍न वदनें, मधुर भाषणें,
मोहुनी सखिने मजला,
संकेत भेटीचा दिला प्रियेने,
कार्तिक पुनवेला..
मी प्राजक्‍ताचा मृदू गालिचा,
तिजसाठी अंथरला,
परि ना आली ती....
परि ना आली ती निष्‍ठुर बाला,
वचन देउनही मजला....

रुसलो मी, रागेजलो,
फुले ती उधळित मग बसलो..
अन्‌, चंद्राच्‍या कुत्‍सित हसण्‍याला,
निमित्त की झालो....
हसण्‍याने मुखचंद्र तयाचा लाल की हो झाला,
सूर्यास पाहुनी प्राचीवरती, मावळून गेला....

हिरा आणि कोंदण...

2008-05-06T00:47:00.000-07:00

हे केवळ म्‍हणायलाच बरे,
की हिर्‍याला कोंदण, तोलामोलाचे, वगैरे..
हिरे, जास्‍तीत जास्‍त पैलूदार बरे,
आणि कोंदण, जरा कमी रेखीवच बरे!!

संसारात पण....

बायका कोंदण, आणि नवरे हिरे..
हिरे, पैलूदार, तेजस्‍वी, जणू तारे..
कोंदण, स्‍वत:च्‍या उरात, बिनबोभाटपणे,
दुसर्‍याचे अस्‍तित्‍त्‍व, खुपसून घेणारे...

बावळट,पारंपारिक कोंदणात, हिरा शोभतो तेजस..
हिरा गळला की, कोंदण, अर्थहीन, भकास.....

पावसा...

2008-04-23T23:03:00.000-07:00

पावसा, धावशी,
वार्‍याच्या मागूनी,
पागोळी भिऊनी,
सोडते वळचणी..

मोत्यांचे शिंपण,
आभाळा मधुनी,
धारांच्या धाग्यात,
घेते मी गुंफूनी..

कडाडे बिजली,
ढगांची आरोळी,
पावसा, सांभाळी,
घरी मी एकली..

सखा ना जवळी,
घर चंद्रमौळी,
निवांत झोपली,
नाजूकशी बाळी..

सख्या रे, पावसा,
लाडक्या, राजसा,
दंगा नको असा,
येई हलकासा..

मग सुखावून,
सोनुली जागेल,
तुलाही देईल,
पापा हलकासा....

कोण मोठा?...

2008-04-19T23:18:00.000-07:00

मन मोहून गेलं,
जेव्‍हां बघितलं,
मधुर, सुगंधी,
गुलाबी कमल,
गोल, हिरव्‍या पानांची,
भोवती मखमल,
अन्‌ तळाशी मात्र..
हीन चिखल, दलदल....

गुलाबाचंही असंच..
मस्‍त, सुगंधी,
फुलांत श्रेष्‍ठ,मोठा,
अन्‌, पानांआड दडलेला,
अहंकाराचा काटा..

कोण महत्‍वाचा?
कोण मोठा?
कमल आणि गुलाब?
की, चिखल आणि काटा?....

पाऊस...

2008-04-19T05:53:00.000-07:00

वार्‍याचा धिंगाणा,
पाऊस हमामा,
सांवळ्‍या ढगांशी,
बिजलीचा झिम्‍मा..

झरते पागोळ,
उखणली माती,
गारांची रांगोळी,
तुळशीभोवती..

विखरली फुले,
पारिजाताखाली,
देठांची ग लाली,
मातीत सांडली..

नदीला येतसे,
पूर अनावर,
सागरभेटीचं
डोळ्‍यांत सपान..

वारा हा भरारा,
उडे सैरावैरा,
पाचोळा गोलात,
फिरे गरागरा..

प्रवाहा संगती,
कागदाच्‍या बोटी,
घेऊन लेकींना,
निघाल्‍या माहेरा....

चंद्र...

2008-04-18T03:40:00.000-07:00

रोजच येतसे,
चंद्र अलवार,
उधळीत सारे,
चांदण वैभव..

तसाच झरतो,
चांदण्‍याचा सडा,
प्राजक्‍ताच्‍या गंधें,
भारीत विभव..

आडून डोकावे,
जादुई नजर,
सावळ्‍या ढगाला,
चंदेरी किनार..

पानांची सतार,
कोवळा थरार,
मोहक,मंथर,
सुगंध लहर..

साजिरा,सुंदर,
आठवांचा पक्षी,
घेतसे भरारी,
पर्णराजीतून..

आळवितो धुन,
मंजुळ,मधुर,
कान्‍हयाची हाक,
जणू वंशीतून....

प्रवाहो...

2008-04-17T11:32:00.000-07:00

आयुष्‍या कडून,
मृत्‍यूच्‍या दिशेने,
जनांचा प्रवाहो,
चाललासे..

जड,सुखी,दु:खी,
शरीराचे ओझे,
पाठीवरी येथे,
प्रत्‍येकाच्‍या..

श्रांत,क्‍लांत पदीं,
चालतात वाट,
आयुष्‍याचा मोह,
सुटेचि ना..

खरे तेज शांती,
मृत्‍यूचिया पार,
चिरंतन सत्‍य,
कळेचि ना..

उत्‍कंठा तेजाची,
जिवाच्‍या मुक्‍तीची,
आस चिरंतन,
मिटेचि ना..

पायांखाली वाट,
खाचा-खळग्‍यांची,
किती,किती चालू?
सरेचि ना....

निखारा...

2008-03-24T05:35:00.000-07:00

निखारा विझत चाललेला,
भसाभसा धूर सोडतेला,
छातीत भरून जीव घुसमटला;
मी फुंकणीने सगळा धूर त्‍याच्‍यावरच फुंकला,
तर परत निखारा चेतला;
त्‍यातून मग नाजूकशी ज्‍वाला निघाली,
अन्‌ तिच्‍यावर भाताची तपेली शिजली.
तवा लालेलाल तापला..
बोटांना चटका बसला,
पण भाकरीही भाजल्‍या..
मीही अशीच जन्‍माला आले, जळता निखारा..
आईने शिक्षणाचे स्‍फुल्‍लिंग चेतवले.
वाढतेलं वय, पदरात निखारा..
बापाने उजवून टाकले..
या चुलीतून त्‍या चुलीत घातला निखारा..
दोन वर्सात दोन निखारे घातले जन्‍माला..
सासूने नोकरीला अटकाव केला,
परत चेतला निखारा..
भाजीचा व्‍यवसाय सुरू केला;
माझा स्‍वाभिमान नवर्‍याच्‍या डोळ्‍यात खुपला,
त्‍याच्‍या आळशीपणाने नोकरीवर घाला आला;
हळूहळू जवळ केले बाटलीला..
परत घुसमट, परत फुंकणी,
परत निखारा चेतला;
एक वेळा, दोन वेळा, चार वेळा,
मी फोडून टाकले बाटलीला..
परत घुसमट, परत फुंकणी,
गोळा केल्‍या बाराजणी,
घेऊन झारे आणि झाडणी,
दारुड्‍या नवर्‍यांची केली फोडणी..
आता कंबर कसली आहे,
आता मागे हटणार नाही,
गावात एकही गुत्ता,
आता शिल्‍लक ठेवणार नाही;
चेतलेला निखारा,
आता जाळल्‍याशिवाय राहणार नाही......

धन्‍यवाद...

2008-03-10T12:13:00.000-07:00

९ मार्च २००८ च्‍या लोकसत्ता, रविवार वृत्तांत 'मर्‍हाटी नेट-भेट' मध्‍ये,
निवडक वाचनीय blog म्‍हणून उल्‍लेखण्‍यात आल्‍याबद्‍दल धन्‍यवाद..
..सुषमा करंदीकर

जाव दे ना गं मला साळंला...

2008-03-08T21:54:00.000-08:00

जाऊ दे ना ग मला साळंला,आई, जाऊ दे ना ग मला साळंला ।।
सकाळधरुन, तू बेगिनं आवरुन, निघून गेलीस कामाला,
वेणीफणी करुन, नि युनिफार्म घालुन मी बघतेय तुज्‍या वाटंला,
कधी येशील तू,आन्‌ कधी मी जाईन,उशीरच होऊन गेला,
शाळेला वेळेवर जान्‍याचा धडा, मी पहिल्‍याच दिवशी चुकविला।।
वेणीफणी करुन....
भांडीकुंडी सारी, बग घासुन-पुसुन, मी ठेवुन दिलित जागंला,
कपडे बी सगळे धुवूनशान अन्‌ लावुन दिलेत दांडीला,
हीरीचं पाणी वढूनशान मी हंडा बी भरुन ठेवला
झाडलोट करून,रांगोळी रेखून, पाणी घातलं तुळशीला।।
वेणीफणी करुन....
संभाळल्‍या बाळाच्‍या दुदाच्‍या वेळा, नि न्‍हाऊ बी घातलंय त्‍येला,
बनवला नाश्‍टा दादासाठी, आन्‌ बाबाला च्‍या बी क्‍येला,
होत्‍या त्‍या पिठाच्‍या चार-पाच भाकरी, नि झुनका बी करुन ठेवला,
नि कालचीच भाकरी नि गुळाचा खडा मी घेतलाय मधल्‍या सुट्‍टीला।।
वेणीफणी करुन....
माझी शाळेला जायची गडबड बघुन, बघ बाबा बी वरडायला लागला,
म्‍हणे, घरातली कामं करायची कुनी, आन्‌ संभाळंल कोन पोरान्‍ला?
लई जाले शिक्‍शान,आन्‌ लई जाली साळा,आता उजवूनच टाकतो तुला,
आई, करीन ग सगळी घरातली कामं,पण शाळा नाई सोडायची मजला।।
वेणीफणी करुन....
जवा दारू पिऊन बाबा येतो घरी, तवा लई भ्‍याव वाटतंय मजला,
कसं ग करशील,कसं संभाळशील, तुजी काळजी बी वाटतीय मजला,
चंदू, बाळा दोघे ग लाहान अजून, आन्‌ चालू हाय दादाची शाळा,
ठेव भरवसा ग, आई शिकीव मला, होईन तुज्‍याच ग आधाराला।।
वेणीफणी करुन....
माये, आई तुजी आन्‌ सासू तुजी, कशा शेतकामाने झिजल्‍या,
आन्‌ तुजा बी जीव, शिक्‍शानाच्‍या विना, आये घरकामाने पिचला,
घाईघाईने लगिन नको मला, आई, साळेत जाऊ दे मजला,
शिकून-सवरून,मोटी शाणी होवून बग मिळवीन सन्‍मानाला ।।
वेणीफणी करुन, नि युनिफार्म घालुन मी बगतेय तुज्‍या वाटंला।।

पाचोळा...

2008-03-07T10:27:00.000-08:00

झिजलेल्‍या वस्‍त्राला,
ठिगळ लावता येईल..
पण....
विरलेल्‍या नात्‍यांना,
फाटलेल्‍या आभाळाला?
भेगाळलेल्‍या जमिनीला?
कसं रे?....

पारिजात...

2008-03-07T10:05:00.000-08:00

गाढ साखरझोपेत,
वार्‍याच्‍या झुळकेबरोबर,
मोहक सुगंधाची चाहूल लागली..
सुगंधाचा मागोवा घेत,
बाहेर अंगणात जाऊन पाहिले तर,
शुभ्र, रेशमी शाल पांघरून,
पारिजात ध्‍यानस्‍थ बसलेला..
त्‍याच गंधलहरींवर झोके घेत,
परत निद्रावश झाले;
जणू सुखस्‍वप्‍न पाहिले....

सकाळी जाग आल्‍यावर,
प्रथम पारिजात आठवला..
अंगणात जाऊन पाहिले तर,
शुभ्र, रेशमी शाल, ओघळलेली..
सुगंध, सार्‍या वातावरणात विरघळलेला;
आणि पारिजात, तसाच ध्‍यानस्‍थ बसलेला..
बाकी फक्‍त निर्माल्‍य आणि पाचोळा..
सुख आणि दु:ख, दोन्‍ही फक्‍त मला?....

मृगजळ...

2008-03-03T02:36:00.001-08:00

मृगजळामागे धावून धावून,
पावले गेली शिणून,
हाती काहीच न लागता,
यौवन गेले सरून..

थकून-भागून गेली काया,
घेरून आल्‍या संध्‍याछाया,
तुझ्‍या भेटीची सदया,
आस लागली हृदया..

मनी-मानसी रे ध्‍यास,
तुझ्‍या दर्शनाची आस,
जीव झाला कासावीस,
तूच माझा होई श्‍वास..

पुरे झाली आता,
काम-क्रोधाची धुमाळी,
आयुष्‍याच्‍या संध्‍याकाळी,
येई,येई रे,वनमाळी....

सख्‍या...

2008-03-02T21:05:00.000-08:00

हात तव हातात धरुनी, चालले मी कुठवरी,
ज्ञात ना व्‍यवहार इथले, ओळखीची न ही नगरी..

नागमोडी वाट हिरवी, नदीकिनार्‍याशी वळे,
अन्‌ उमटलेली तीवरी, मम मेंदीभरली पाउले..
वनी,उपवनी येथ फुलली, विविध रंगांची फुले,
आणि पुष्‍करिणीत अवतरले, सुरम्‍यचि नभ निळे..

सोनसळी रे किरण रविचे, अरुणरंगी रंगले,
पारिजाताच्‍या तळी, केशर सुगंधी सांडले..
कोकिळेच्‍या पंचमाने, नीज अवनीची खुले,
अन्‌ गर्भरेशमी पदर, वार्‍यासंगतीने सळसळे..

कमलपाशी गुंतलेले, भृंग होती मोकळे,
अन्‌ गुणगुणत गीते नवी, मधुप्राशनी बघ दंगले..
ऊन मध्‍यान्‍हातले, हळवे मुलायम भासले,
प्रेम विश्‍वासाचिया रे, संगतीने कोवळे....

पाखरांच्‍या कलरवें, मी नेत्र जेव्‍हां उघडिले,
कोण तू,अन्‌ कुठली नगरी? स्‍वप्‍न केवळ पाहिले..
एकलीच मी, तुडविते रे वास्‍तवाची जंगले..
स्‍वप्‍न ठेवुनी लोचनी, अन्‌ माळुनी अग्‍निफुले....

पाचोळा...

2008-03-01T11:14:00.000-08:00

लढण्‍यासाठी,रडण्‍यासाठी,
आणि तिरडीसाठीही,
लागतोच की....खांदा.

पाचोळा...

2008-03-01T02:28:00.000-08:00

काट्‍याने निघतो काटा,
विषावर उतारा विषाचा,
तर,द्‍वेषाच्‍या पाण्‍याने द्‍वेष धुता येईल?...

पाचोळा...

2008-03-01T02:24:00.000-08:00

जगू शकतेय तुझ्‍याशिवाय,
पण मरणार मात्र नाही,
तुला पाहिल्‍याशिवाय....

उखाणा..

2008-02-23T05:16:00.000-08:00

केळीची कमान दारावर,
सनई-चौघड्‍याचा गजर..

कोमल अंगावर हळद ओली,
मोत्‍यांची मुंडावळ हळूच झुलली..

अबोलीची वेणी,जुईचा गजरा,
थोरा-मोठ्‍यांच्‍या कौतुकाच्‍या नजरा..

सावधानच्‍या इशार्‍याबरोबर अक्षतांचा वर्षाव,
कुंकवावरती सुधाकरांचे नाव..

सहजीवनाची सुरेल सुरुवात,
सुधाकरांच्‍या दीपात,सुषमा फुलवात....

पाचोळा...

2008-02-21T09:31:00.000-08:00

मन मरुन गेलंय,
तरी जगावं लागतंय,
छातीत ठोके वाजतायत तोवर...

उखाणा...

2008-02-21T09:17:00.000-08:00

रामाच्‍या गं पारी,
सूर्यदेव आले दारी..

दाराशी काढली रांगोळी,
मण्‍या-मोत्‍यांच्‍या ग ओळी..

रांगोळीत लिहिले रामाचे नाव,
रामाच्‍या ठायी सीतेचा भाव..

रांगोळीने रेखले स्‍वस्‍तिक,
थोरा-मोठ्‍यांच्‍या नजरेत कौतिक..

अंगणात बहरला पारिजात,
सुधाकरांच्‍या सहवासात, सुगंधाची बरसात..

उखाणा...

2008-02-21T09:03:00.000-08:00

रामाच्‍या गं पारी,
सूर्यदेव आले घरी,
सूर्याचे किरण सोनेरी,
पडलेत माझ्‍या पदरावरी..

साडी नेसलेय चंदेरी,
रंग भरलेत फुलपाखरी,
रंग-बिरंगी साडीला,
काठ शोभती जरतारी..

चमकत्‍या, जरतारी पदरावर,
खुलतोय पिसारा मोराचा,
सुषमा-सुधाकरांच्‍या संसारात,
अक्षय झरा आनंदाचा...

उखाणा...

2008-02-15T10:53:00.000-08:00

आला महिना माघाचा,
सूर्यदेवाच्‍या पूजेचा..
सूर्यप्रकाशात रंग सात,
सूर्यदेवाच्‍या रथाला घोडे सात..
सात रंगांची कमान,
आलं देवाचं विमान..
विमान उतरलं अंगणात,
तुळस डोलतेय वृंदावनात..
अंगणामधली उखणली माती,
गायीचे शेण सारवण्‍यासाठी..
गोठ्‍यात गाय, देवांची माय,
गायीच्‍या दुधावर दाट साय..
साय काढली चांदीच्‍या वाटीत,
घेऊन गेले मधल्‍या माडीत..
मधल्‍या माडीत बसलंय कोण?
इकडची स्‍वारी, आणखी कोण?..
तुळशी, तुळशी, आरोग्‍य दे,
सौभाग्‍याचे दान दे..
हळदी-कुंकू वाहते ग,
सुधाकरांचे नाव घेते ग....

तेव्‍हांच...

2008-02-12T10:57:00.000-08:00

होइल जिवाची घालमेल, खाशील कितिक खस्‍ता,
कडे-खांद्‍यावर बाळाला घेऊन, तुडवशील ऊन-पावसाचा रस्‍ता..
तुझ्‍याच हाडा-मांसाचा तो, जेव्‍हां नाही पुसणार तुला,
तेव्‍हांच तुला समजेल, की काय वाटले असेल मला.....

जिवाचा आटापिटा, रक्‍ताचं पाणी करशील,
आपण ऊन-वारा सोसत, त्‍याच्‍यासाठी सावली बनशील,
जेव्‍हां मोठा होइल, तेव्‍हां जुमानणार नाही तुला,
जेव्‍हां पंख फुटतील, तेव्‍हांच शिंगंही फुटतील त्‍याला,
जन्‍माला घालून मेहेरबानी केलीस, हेच तोही सुनावेल तुला,
तेव्‍हांच तुला समजेल, की काय वाटले असेल मला.....

चीज..

2008-01-25T02:13:00.000-08:00

अस्‍ताई
तुम्‍हरे बिन कछु सूझत नांहि
भई दीवानी मीरा जैसी ।
तरपत हूं दिन रात मैं प्‍यासी
घायल जलबिन मछली सी।।
अंतरा
कब आओगे मोरी अटरिया
सकल सुहावन सांवरिया ।
बिनती करत मनवा बांवरिया
आवो बेगिन म्‍हारो पिया।।

Me n You..

2008-01-25T01:43:00.000-08:00

The only road goes to you,
laced with the flowers of dreams and passions..

The only mound of ego,
I cannot overcome, between me and you..

The only wave of anger, I cannot ride,
breaks on the banks of you..

The only river of grudges and prejudices,
I cannot bridge, between me and you..

The only ray of hope, leads me to you,
whice travels through the clouds of untrust..

The only silken string of eternal love,
binds me to you....

मृगजळ....

2008-01-19T01:58:00.000-08:00

कवायत करताना,
एका सैनिकाचा चुकला ठेका,
कारण त्‍याला ऐकू येत होते,
अज्ञाताचे पडघम....
माझेही तसेच झाले..
इंद्रधनुषी कमानीवर बसलेल्‍या,
सोनेरी पाखरामागे धावत सुटले,
अन्‌ फशी पडले; पदरी आलं..
पाय पोळत वाळवंट तुडवणं,
काया जाळत क्षितिज गाठणं,
माथ्‍यावर ऊन, पायांतळी रण,
घायाळ तन, घायाळ मन..
कारण, ते होते मृगजळ,
खोटे,फसवे केवळ......

मी अशी..

2008-01-09T09:56:00.000-08:00

मी अशी नि:स्‍तब्‍ध उभी,
एकेक पान गळताना,
हिरवी पाने पाचोळा होऊन,
वार्‍यासंगे भिरभिरताना..
पानांचा हिरवा पानोरा,
स्‍मृतिपुष्‍पांचा नवलफुलोरा,
रसभरल्‍या,टप्‍पोर फळांचा,
सडा अनावर ओघळताना..
बालपणीची अल्‍लड नाती,
तारुण्‍यातील अवखळ प्रीती,
आजवर जोपासलेल्‍या हिरवाईची,
एकेक नाळ तुटताना..
भावबंध अन्‌ नाती सरती,
तुटू पाहती रेशीमगाठी,
घट्‍ट माती परि मुळांभोवती,
सख्‍या तुझ्‍याप्रती,येऊ देइना..

सूर्या...

2008-01-06T22:39:00.000-08:00

एक बरं केलस,
झोप उडवून टाकलीस,
स्‍वप्‍नांचा सोपान तुटला..

आता अर्धमिटल्‍या डोळ्‍यांना,
स्‍वच्‍छ दिसू लागलाय वर्तमान..

गुलाबी,केशरी रंग घेऊन,
अवतरलास तू प्राचीवर,
अन्‌ मनातले निळे-करडे भाव सारे,
पळून गेले क्षितिजापार...

आता सारी वाट झालीय प्रकाशमान..
नवी क्षितिजे झालीय्‌त दृश्‍यमान..
उघडलीय इंद्रधनूची उज्‍ज्‍वल कमान..

आता दूर कर सार्‍या व्‍यथा-वेदना..
अन्‌ कर विश्‍वाचे कल्‍याण......

सख्‍या...

2007-12-12T22:22:00.000-08:00

बालपण,तारुण्‍य,उतारवय,
सगळ्‍याच पायर्‍या निसरड्‍या..
शत्रू, मित्र, रक्‍ताची नाती,
सगळ्‍याच जणू पायातल्‍या बेड्‍या..
संसार,शिक्षण,करियर,
सगळ्‍याच अंधारातल्‍या उड्‍या..
भोळी स्‍वप्‍नं, खुळ्‍या शपथा,
किती आशा वेड्‍या..
कशा रे सावरायच्‍या,
आयुष्‍याच्‍या विस्‍कटलेल्‍या घड्‍या?..
कुठवर सोसायच्‍या,
क्रूर काळाच्‍या खोड्‍या?....
जाऊ दे,चल....
जरासे हसू या गड्‍या....

पाखरा....

2007-11-22T10:44:00.000-08:00

पारिजाताच्‍या फांदीला,
खोपा इवला टांगला,
घेई मंद मंद झोके,
सुगंधाच्‍या संगतीला....

मऊ केशरी दुलई,
पांघरून ग उबेला,
इवलासा जीव,
थाटामध्‍ये पहुडला....

भुर्रकन उडे माय,
कधी कोठीत,अंगणात,
तान्‍हुल्‍याची उष्‍टी शिते,
घाली पिलाच्‍या चोचीत....

इशी,मम्‍म,गाई,
सारे सांभाळिते माय,
बसे चिमणा दारात,
राखणीला....

मायेच्‍या सावलीत,
दोघे वाढले झोकात,
पुत्र घरकुलात,
आणि पाखरू खोप्‍यात....

विद्‌येसाठी पुत्र,
जाई दूर दूरदेशी,
तूही जाई रे पाखरा,
राही त्‍याच्‍या वळचणीशी....

रिझवी त्‍याच्‍या मना,
तुझ्‍या मंजुळ बोलांनी,
जननी,जन्‍मभूमी,
यांच्‍या सांग आठवणी....

धनवंत,विद्‌यावंत,
पुत्र येईल माघारा,
तुही येई रे पाखरा,
देईन मोतियाचा चारा....

दिवाळी....

2007-11-14T10:59:00.000-08:00

माझ्‍या मनाच्‍या आकाशी,
चंद्रतारे गोंदलेले,
फटफटली पुरब,
जरी दीप विझलेले....

दीप जरी विझलेले,
कुठे अंधार राहिला?
सुमंगल शुक्रतारा,
क्षितिजी ग उगवला....

दिवसाच्‍या स्‍वागताला,
प्रकाशली ग कमळे,
रंग आशेचे हासरे,
अल्‍पनेत झिरपले....

सात ठिपके सुखाचे,
सात ठिपके दु:खाचे,
करी आड संकटाला,
स्‍वस्‍तिचिन्‍ह मंगलाचे....

दारी आकाशकंदिल,
झगमगले तेजात,
कुंकुमाच्‍या पावलांनी,
आली दिवाळी हासत....

दारी सनईचे सूर,
रुणझुणले मोदात,
सवें सखी सुवासिनी,
करी स्‍वागत सस्‍मित......

इथंच..

2007-10-30T04:40:00.000-07:00

आपण दोघे एकाच बोटीतले प्रवासी,
उलटलेल्‍या बोटीतले..
किनार्‍यापासून दूर येऊन उलटली बोट..
काही किनारे आपण मागे सोडले,
काही किनार्‍यांनी आपल्‍याला सोडून दिलेलं..
आता परत किनार्‍याकडे जायचं?
की, एकमेकांचे हात धरून, इथंच.........?

सावली..

2007-10-08T01:15:00.000-07:00

मुखवट्‍याआडची तुझी मुद्रा, जगाला कुठे दिसली?
तू मोठा शहाणा, मोठी तुझी सावली,
तुझ्‍या सावलीत माझी प्रतिमाच हरवली...

उसळून बाहेर पडले, तुझ्‍या सावलीतून,
तेव्‍हाच खर्‍या अर्थी समजून चुकले,
तुझ्‍या सावलीतच किती जास्‍त होरपळले...

होरपळायचेच जर आहे तर,राहीन उन्‍हातच,
सोसेन चटके,पण, माझी मीच होईन सावली.
माझा रस्‍ता दाखवेल मला माझ्‍या हातातली दिवली...

दीप..

2007-10-07T10:25:00.000-07:00

टाचका संसार,
जसा बंगला पत्त्‍याचा,
त्‍याला आडोसा
मायेच्‍या पदराचा..

हाताला चटका,
सये सोशीन तव्‍याचा,
परी जिवाचा चटका
सोसवेना..

वैशाखाचा दाह,
झरा आटे विहीरीचा,
परी राखीन ओलावा
अंतरीचा..

काळोखाची वाट,
राती अंधार माईना,
परी दीप मालवो ना
विश्‍वासाचा..

लेक माझी..

2007-10-04T00:40:00.000-07:00

पहाटेच्‍या रानवार्‍या,
किती उधम करिशी,
त्‍यापरीस धर वाट,
माझ्‍या लेकीच्‍या घराची..
अंगणात पारिजात,
फुललासे पानानिशी,
देते सुगंध जरासा,
तिच्‍या घरला नेण्‍यासी..
नेई जपून, जपून,
ठेव तिच्‍या खिडकीशी,
बघ हळूच,हळूच,
लेक माझी आहे कशी..
जा रे हळू तिच्‍यापाशी,
तिला सांग माझे गूज,
दे रे सुगंध मायेचा,
हातांनी,मोरपिशी..
म्‍हण तिला,सुखी ऐस,
कर सुखी ग सार्‍यांसी,
आणि माझ्‍या ग सयेने,
नको होऊ कासाविशी..
तिच्‍या एका स्‍मरणाने,
मनी लकेर हास्‍याची,
वाणी मधुर तियेची,
रुणझुणे कानापाशी..
तिच्‍या मनाच्‍या कुपीत,
लयलूट सुगंधाची,
तिच्‍या कीर्तीचा सुगंध
आण मला उत्तरासी....

पाचोळा...

2007-10-01T08:00:00.000-07:00

दीप तेवे वृंदावनी,
सांज दाटली,दाटली,
आता येई परतुनी,
किती पाहू रे वाटुली?..

पाचोळा...

2007-10-01T07:53:00.000-07:00

मेंदीभरल्‍या पाऊलीं,
पाणंदीला चढे लाली,
भाव-भावनांची नक्षी,
तीत खुबीने गुंफली...

पाचोळा...

2007-10-01T07:48:00.000-07:00

जीवनाच्‍या आडावरी,
घागरींचे येणे-जाणे,
हिंदळती कटीवरी,
सुखदु:खाचे उखाणे...

पाचोळा...

2007-10-01T07:47:00.001-07:00

सुर्यदेवाच्‍या साथीने,
प्रकाशाचे येणे-जाणे,
सुखदु:खाचा हा खेळ,
उन-सावलीच्‍या रुपाने...

पाचोळा....

2007-09-25T11:24:00.000-07:00

पुलाखालून धो-धो पाणी वाहून गेलं,
तरीही नदी वाहतेच आहे,दुथडी भरून,
डोळ्‍यांमधून अलोट अश्रू वाहून गेले,
तरीही हसू फुटतंय अजून,आतून,कुठून?

ठेच..

2007-09-25T11:22:00.001-07:00

पाउलवाट नेहमीची,
पायाखालची,सवयीची,
तरीही आज ठेच लागली,
आठवण आली का कुणाची?...

श्रावण...

2007-09-06T23:43:00.000-07:00

पुन्‍हां एकदा ढगांना येतो प्रेमाचा उमाळा,
सृष्‍टीच्‍या अंगावर हिरवाईच्‍या नाना कळा....

पर्वतशिखरांना लागतो ढगांचा लळा,
कभिन्‍न कातळही होतो लेकुरवाळा....

श्रावणसरींच्‍या अगणित मुक्‍तामाळा,
लहरतो,शहारतो आनंदाचा मळा....

मोहरलेल्‍या मनाला स्‍वप्‍नांचा चाळा,
मनामध्‍ये घुमतो कृष्‍णाचा घुंगुरवाळा....

कावळेदादा..

2007-08-29T23:24:00.000-07:00

रविवारच्‍या सुटीचा घोळ फारच बाई,
उशिरा उठणी,पेपर,खाणी,काही आवरतच नाही..
बारानंतर होऊन गेली स्‍वैपाकाची घाई,
एकीकडे भाजी-आमटी,एकीकडे कुकरची शिट्‍टी..
एक पोळी तव्‍यावरती,एक पोळपाटावरती,
तेवढ्‍यात वाजली खर्रर्कन्‌ दारावरची घंटी..
स्‍वैपाक सोडून आता कोण दार उघडेल बाई?
टीव्‍ही सोडून उठायला कोणी तयार नाही..
तेवढ्‍यात वाजली बेल वाजली परत-परत,
दार उघडायला मग गेले धावत-पळत..
दारात उभा होता माझा दोस्‍त कावळेदादा,
रोड दिसला थोडा, थोडा होता उदासवाणा..
रुसलास का रे कावळेभाऊ? हल्‍ली येत नाहीस,
तिरपी मान करुन माझ्‍याकडे पोळी मागत नाहीस..
बाळे माझी जेवता-जेवता तुझ्‍याशी गप्‍पा मारत,
एक घास चिऊताईला,एक तुलाही देत..
हो ग ताई,काय सांगू,आमची अडचण बाई?
घरटं करायला,सावलीला,आम्‍हांला झाडच उरलं नाही..
सोसायटीत,रस्‍त्‍यांवर बघ,झाड नाही कुठेच,
जातो मग जंगलाकडे,राहतो झालं तिथेच!!..
निसर्गप्रेमी आहेस ना? मग प्‍लीज एवढं कर,
बाल्‍कनीत, खिडकीत, गच्‍चीत,दोन तरी झाडं लाव..
रोज येईन मग इथे,बाळघास खाईन,
उडेन,फिरेन,मान उडवेन,तुझ्‍या बाळाला खेळवेन..
वचन देते कावळेदादा,नक्‍की करीन एवढं,
माझ्‍याबरोबर शेजारणीही लावतील दोन-दोन झाडं..
बघता-बघता सोसायटी,गाव होईल हिरवंगार,
मग माझा कावळेदादा उदास नाही राहणार......

इ टीव्‍ही शीर्षकगीत

2007-08-19T09:46:00.000-07:00

स्‍वप्‍न बांधून पंखात,पक्षी पांगला नभात,
धुंद भरारे,थरारे पक्षी अनोख्‍या जगात...

रंग ओळखीचे जरी अनोळखी अंतरंग,
दूर स्‍वप्‍नांच्‍या रंगात झाले क्षितिजही दंग,
खोपा कोणता घेऊन नवी येईल पहाट...

आज आभाळाच्‍या मनीं इंद्रधनूची कमान,
आनंदाच्‍या कमानीला आज सुखाचे तोरण,
धुंद यक्षगान चाले सप्‍तस्‍वरांच्‍या लयीत....

दिवे...

2007-08-18T04:58:00.000-07:00

गूढ अंधारात,
चमकणारे काजवे,
आशेचे दिवे....

बळ....

2007-08-18T04:55:00.000-07:00

अंधारात डोकावण्‍यानेच,
बळ मिळते,
प्रकाशाकडे झेपावण्‍याचे....

श्रावण..

2007-08-18T04:24:00.000-07:00

टपोर थेंबांची काचेवर नक्षी,
मनाच्‍या वळचणीला आठवणींचे पक्षी..

ओल्‍या अंगणात धारांचा झिम्‍मा,
ओल्‍या मनात आठवणींचा हमामा..

काळ्‍याभोर ढगावर विजेची रेघ,
मनाच्‍या आभाळात आठवणींचे मेघ..

सरत्‍या धारांची अंगणात पागोळ,
मोहनाच्‍या आठवणीनी भरली ओंजळ....

श्रावण..

2007-08-18T04:17:00.000-07:00

असा श्रावण श्रावण,
झिरपला माझ्‍या मनीं,
सारे दु:ख उरातले
पाझरले डोळ्‍यातुनी....

मग मनाच्‍या अंगणी,
आनंदाची बरसात,
माझ्‍या प्रसन्‍न हास्‍याला
पारिजाताची संगत....

निळ्‍या-सावळ्‍या ग भाळी,
चांदव्‍याचे गोंदवण,
हारी जिवाची काहिली,
ओल्‍या मातीचे चंदन......

दिवाणा....

2007-08-18T04:13:00.000-07:00

अवखळ लाटांचा,
रात्रभर धिंगाणा,
किनारा दिवाणा....

चित्‍तरकथा.....

2007-08-08T11:18:00.000-07:00

ओढाळ,वेड्‍या लाटांची,
चित्‍तरकथा प्रीतीची,
क्षणिक भेट किनार्‍याची,
पुन्‍हा वाट परतीची......

हरि रे....

2007-08-01T22:39:00.000-07:00

हरि रे हरि, दु:ख हरी,
हरि रे हरि, क्‍लेष हरी..
हरि रे तव मुरलीच्‍या
स्‍वरलहरी दु:खहारी.....

हरि रे हरि, वेळुवनीं
घुमणारी वंशरी,
रे सुरेल जादुगिरी,
मोहिनी मनावरी.....

श्‍यामवर्ण यमुनेच्‍या
दर्दभर्‍या अंतरी,
हरुनी सर्व दु:ख सख्‍या,
भरुनी टाकी माधुरी.....

हरि, तुझिया मुरलीतुनी
स्‍वरवलये साकारुनी,
दावी तव मूर्त सगुणी,
पाही रे हासुनी.......

सारे काही....

2007-08-01T07:32:00.000-07:00

कधी चालताना वाट काटे घुसले पायात,
हाय चटके पायाला,मध्‍यान्‍हीच्‍या तडाख्‍यात..
काट्‍या-चटक्‍यांची तमा कधी बाळगली आहे?
भोगायाचे सारे काही माझे भोगून झाले आहे.....

फुलझेले खुडताना नाग डसले मागून,
ताराफुले वेचताना गेले पंखही जळून..
परि, उडण्‍याची आस कुठे भंगलेली आहे?
भोगायाचे सारे काही माझे भोगून झाले आहे.....

मृत्‍युदेवता येऊ दे माझ्‍या समोर साक्षात,
सात पाउली करीन सात लोक पादाक्रांत..
भार खांद्‍यावरी तिच्‍या सुखेनैव दिला आहे,
भोगण्‍याचे सारे काही माझे भोगून झाले आहे.....

निळ्‍या आसमंती घुमे शांत सागराची गाज,
जणू,स्‍वागत कराया श्रीहरीचे अलगुज..
श्‍याममेघ करुणेचा शिरी बरसत आहे,
भोगायाचे सारे काही माझे भोगून झाले आहे......

शुक्रतारा....

2007-07-30T09:51:00.000-07:00

भेडसावणार्‍या भीतीच्‍या पारंब्‍यांची,
अंधाराच्‍या सावल्‍यांची,
कितीही काळीकुट्‍ट असली जरी,
रात्र ही सरतेच तरी!!
दृढ विश्‍वासाचा,आशेचा धृवतारा,
वाट दाखवतोच खरी.....

मग,स्‍वयंतेजाने प्रकाशतो
दैदिप्‍यमान सूर्यतारा..
झळाळून उठतो आसमंत सारा..
ओढाळ लाटांना मिळतो किनारा..
सारे क्षितिज येते कवेत..
अन्‌,मनोभूमीवर उगवतो,
स्‍वप्‍निल शुक्रतारा.......

पाचोळा....

2007-07-30T09:48:00.000-07:00

अवचित पाहिलं,
इकडे तिकडे,
तू मनात डोकावलास ना......

पाचोळा...

2007-07-30T09:43:00.000-07:00

स्‍वप्‍नं,जड होतात,
गरीबाच्‍या डोळ्‍यांना,
नि,सांडून जातात.....

मन मोकळं.....

2007-07-30T09:39:00.000-07:00

मन मोकळं मोकळं,
अमावास्‍येचं आभाळ,
चंद्रावाचून उजळ,
एकलंसं.....

मन मोकळं मोकळं,
रिती होणारी ओंजळ,
कृष्‍णमेघांची पागोळ,
किती भरू?.....

मन मोकळं मोकळं,
जशी झरते बकूळ,
करी सुखाची शिंपण,
धरेवरी.....

मन मोकळं मोकळं,
जशी पुराणी वाकळ,
धागे रेशमी मायेचे,
देती बळ.......

पाचोळा....

2007-07-30T09:19:00.000-07:00

वणव्‍याला घाबरुन,
धावतोय सैरावैरा,
भणाणता रानवारा........

सख्‍या.....

2007-06-01T04:28:00.000-07:00

मन उडते आकाशी, पंख माझे कापलेले,
पाय धावतात पुढे, रस्‍ते सारे थांबलेले..

थांबलेल्‍या वाटेवर, वाट पाहे वाटसरू,
म्‍हणे मला, चल सखे,चल हात हाती धरू..

चल हासत, हासत सखे,वाट पार करू,
सखे क्षितिजाच्‍या पार, खोपा प्रीतीचा उभारू..

कशी येऊ जिवलगा, माझी सुटेना रे बेडी,
प्राण घेतसे भरारी, जडशीळ माझी कुडी..

दुरुनच छेडी धुन, मोहकशी बासरीची,
सप्‍तस्‍वरांच्‍या लयीत, आस विरेल मायेची............

इथेच....

2007-05-28T00:30:00.000-07:00

इथल्‍याच एका वाटेवरुन, गेलो होतो चालत..
इथल्‍याच एका झाडाखाली, बसलो होतो बोलत..
कधी इकडेतिकडे, कधी एकमेकाकडे बघत..
कधी बोलत,कधी हासत, असे चाललो होतो रमतगमत..
कधी अचानक धावून आलेल्‍या पावसाच्‍या सरीत..
अर्धा तू,अर्धी मी, भिजलो होतो एका छत्रीत..
चेहर्‍यावरचे ओले केस,सावरताना चोरुन न्‍याहाळीत..
नजर पकडली जाताच, कसे हसलो होतो किंचित..
झाडाखालचा टपरीवाला, हसला होता खुशीत..
चहा गाळता-गाळता, गुणगुणला होता एक गीत..
वहीच्‍या शेवटच्‍या पानावर, तुझ्‍या नावाभोवती नक्षी कोरीत..
कितीदा तरी आपल्‍याच नादात, हरवले होते तुलाच आठवीत..
चिठोर्‍यावर,मनमोकळेपणे, उघड केले होते गुपित..
अन्‌ टपरीवाल्‍याच्‍या हाती, दिला भेटीचा संकेत..
पण नाही आलास तू.........
पण नाही आलास तू,नि मी मात्र ठरले,घरच्‍यांच्‍या रागाची बळी..
निमूट बोहोल्‍यावर उभी राहिले बांधून मुंडावळी..
............................................
चष्‍मा, स्‍वप्‍नाळू डोळ्‍यांवर, रुपेरी तार केसांत..
ताठ बांधा,चालण्‍यात झपाटा, राहिलायस तसाच शिडशिडीत..
अवचितपणे सामोरा आलास, भरलेल्‍या आगगाडीत..
"का आला नाहीस?" हा प्रश्‍न, माझ्‍या नजरेत वाचीत..
साजुक,ब्राह्‍मणाची पोर तू, वाढलीस शानदार हवेलीत..
कशी ग रमली असतीस, माझ्‍या दोन खोल्‍याच्‍या चाळीत??
मन आवरले,नि मला झोकून दिले,कसल्‍या न कसल्‍या चळवळीत..
नाही आलो झाले !!
जगलो असाच काळीज जाळीत........................................

आधारित-स्‍वामी

2007-05-07T22:45:00.000-07:00

तुझे मन माझे झाले
माझे मन तुझे झाले
तुझा प्राण,माझा प्राण
उरले ना वेगळाले.....

काटा तुझ्‍या पावलात
आसू माझ्‍या ग डोळ्‍यात
सल तुझ्‍या काळजात
मन माझं खंतावतं.....

तुझ्‍या हासण्‍याची रेष
माझ्‍या जीवनी प्रकाश
तुझ्‍या मनात बकूळ
मनिं माझ्‍या दरवळ.....

अमल....

2007-04-24T00:16:00.000-07:00

निळे आकाश वरती,
निळा सागर खालती,
अशा विशाल शिंपेत,
एक प्रगटला मोती....

उगवत्‍या रविकरें,
झाले आभाळ निरभ्र,
पसरली आभा शुभ्र,
मंगलाची,पवित्रतेची....

एका स्‍मिताच्‍या रेषेने,
पट पांगले तमाचे,
पृथ्‍वीवरी पसरले,
दिव्‍य तेज अमलाचे......

सख्‍या..

2007-04-02T03:03:00.000-07:00

पौर्णिमेचा चंद्र आता उगवला गगनात आहे..
खाचखळग्‍यातुनही त्‍याच्‍या हासणे वोसंडताहे....

तू दिलेला मोगर्‍याचा हार काही सांगताहे..
रातराणीच्‍या सुगंधे भारलेला वात आहे....

संगतीला तूही माझ्‍या, हात तव हातात आहे..
वारुणी अन्‌ चांदण्‍याची दुथडी भरुनी वाहताहे....

नको विचारू...

2007-04-01T03:16:00.000-07:00

नको रे असा
हट्‍ट धरूस,
नको विचारूस काही..
नको लावूस
सांगायला,
मनातले सारे काही..

काही सांगताना,
काय लपवायचे
ते कळणार नाही मला..
जे लपवायचे,
तेच नेमके
सांगून बसेन तुला..

काळजाच्‍या कुपीत
बंदिस्‍त असणारे,
मुग्‍ध भाव सारे..
डोळ्‍यातल्‍या
पाण्‍याबरोबर
वाहून जातील ना सारे.....

अळवावरचे पाणी.....

2007-03-27T02:28:00.000-07:00

प्रीती हे अळवावरचे पाणी
वेड्‍या अळवावरचे पाणी......

भुलशिल जरि त्‍याच्‍या तेजाने
धरू पाहशिल प्रेमभराने
किंचितशा परि तव स्‍पर्शाने
जाइल ओघळुनी,
अश्रुपरि धरणीलागोनी..
प्रीती हे अळवावरचे पाणी....

निरभ्र,सुंदर,रम्‍य नभांगणी
येती दीपकळ्‍या उमलोनी
एखादीवरि नजर खिळवुनी
रमशिल जर स्‍वप्‍नी,
क्षणार्धात ती येइल भूवरी
पत्‍थर होवोनी..
प्रीती हे अळवावरचे पाणी.....

संवाद...

2007-03-15T02:49:00.001-07:00

सूत्रधार मला म्‍हणाला-
चल हं लवकर,आता रंगभूमीवर तुझ्‍या प्रवेशाची वेळ झाली.
कपडेपटात तुझ्‍यासाठी कपडे ठेवले आहेत,ते घाल..
मी बघितले,तर तिथे दोनच कापडाचे तुकडे होते.
मी म्‍हटले-हे दोन, एवढेच??
सूत्रधार म्‍हणाला- हो,तेवढेच घाल.एक छातीला,एक कमरेला...
हल्‍ली एवढेच घालतात....
या आधीच्‍या प्रवेशात घातले होतेस की,वेगवेगळे कपडे..
कधी वल्‍कले,कधी पानेफुले....
एकदा,राणी एलिझाबेथचा झगा घातला होतास..
तीन दासी होत्‍या,त्‍याचा घोळ धरायला......
पेशवाईत शालू,शेले,दागिने,घालून वाकली होतीस......
हे मागच्‍या प्रवेशातील लाल आलवण....
आयुष्‍यभर...sorry...प्रवेशभर पांघरलंस......
या वेळी,हे इतकंच घाल....
मग मी ते लावून/लेवून रंगभूमीकडे निघाले....
तो धावत माझ्‍या मागे आला,नि म्‍हणाला-अगं,हा रुमाल!!
हा विसरुन कसं चालेल??
-घाल वल्‍कले,नाहीतर पानेफुले..
-झगा,आलवण,नाहीतर शालूशेले..
पण,डोळे पुसायला रुमाल तर लागेलच!!
मला आठवला,पांचालीला साड्‍या पुरविणारा श्रीकृष्‍ण....
तिच्‍यापासून माझ्‍यापर्यंत,सगळ्‍यांचे डोळे ओले.....
मी म्‍हंटलं- तर मग कोरडे ठक्‍क का करीत नाहीस,आमचे डोळे??
मी बघितले,तर तो निश्‍चल..त्‍याचे डोळे सजल...
मग,मी त्‍याला डोळे पुसायला रुमाल दिला,
आणि रंगभूमीकडे निघाले...कोरड्‍या डोळ्‍यांनी!!

पाचोळा

2007-03-14T04:06:00.000-07:00

कसली ओढ,कुठली आस,
समजत नाही..
कुठली दिशा,कुठली साद,
उमगत नाही..
संसाराचा पसारा काही
आवरत नाही..
पायाखाली अवघड वाट,
सरत नाही....

मैत्र..

2007-03-13T11:03:00.000-07:00

मंतरलेल्‍या वनात,
आरसपानी तळ्‍यात..
अलवार उमलणारं,
तुझं माझं मैत्र....

तुझं हळवं तरुणपण,
क्षणोक्षणी शहाणं होत जाणारं..
माझं शहाणं वय,
क्षणोक्षणी हळवं होत जाणारं....

मीच मी...

2007-03-13T03:31:00.000-07:00

माझ्‍या श्‍वासाच्‍या लयीत
वारे वाहती सर्वत्र,
नजरेच्‍या इशार्‍याने,
होई दिवस वा रात्र.
मन उचंबळुनी येता,
येती पावसाच्‍या सरी,
मीच या पृथ्‍वीवरी राज्‍य करी,
अधिराज्‍य करी.....

सुख झंकारता मनी
नवे धुमारे फुटती,
ओल्‍या मातीतून नव्‍या
इच्‍छा,आशा अंकुरती.
तृप्‍त हुंकाराने माझ्‍या,
नादे कृष्‍णाची बासरी.
मीच या पृथ्‍वीवरी राज्‍य करी,
अधिराज्‍य करी.....

पाचोळा

2007-03-11T11:16:00.000-07:00

चमकदार डोळ्‍यात
काजळाची रेघ,
निळ्‍यासावळ्‍या ढगावर
विजेची रेघ.......

पाचोळा

2007-03-11T11:08:00.000-07:00

काळीकुट्‍ट सावलीही,
विश्‍वास देते की,
मागे प्रकाश झगमगतोय..

रंग

2007-03-11T11:03:00.000-07:00

सत्‍याच्‍या प्रकाशात,
गोरा रंग,
आतून कुजलेला....

सत्‍याच्‍या प्रकाशात,
काळा रंग,
उमलून झळाळलेला....

पाचोळा

2007-02-08T23:31:00.000-08:00

स्‍मरणाच्‍या फुलांनी
भरली ओंजळ,
आता मात्र पानगळ....

विराणी

2007-02-07T10:09:00.000-08:00

ओढ लागलीसे
तुझ्‍या सगुण रुपाची,
क्षुद्र मी अज्ञानी,
निर्गुणी.........

तुझ्‍या सगुण रुपाची
अशी मोहिनी मानसी,
चित्त अहर्निशी,
तुझे ठायी.........

चित्त अहर्निशी
तुझ्‍यालागी झुरे,
किती येरझारे,
जन्‍मोजन्‍मी..........

जन्‍मजन्‍मांतरी
तुझ्‍या भेटीची असोशी,
कासया श्रीहरी
कासाविशी..........

कसा रे श्रीहरी,
जीव झालासे मंथर,
एका श्‍वासाचे अंतर
का न मिटे??.........

न मिटे हा जीव,
न मिटे यातना,
का न ये करुणा
तुजलागी??...........

तुजलागी आण
माझिया जिवाची,
सोडवी मायेची
निरगाठ............

तन मन धन,
तुजवरी उधळोनी,
झाले मी उन्‍मनी
विरहिणी............

पाचोळा

2007-02-06T11:38:00.000-08:00

उतरणीवरचा सूर्य क्षितिजाआड झेपावला,
कमलिनीच्‍या मिठीमध्‍ये भुंगा गुरफटला...
सोड सोड कमलिनी,जाऊ दे ना मला,
भुंग्‍याचा गुंजारव मिठीतच विरला...
सुप्रभाती पूर्व दिशा केशराने माखली,
क्षितिजावर रविराजाची स्‍वारी उगवली...
रविकराच्‍या स्‍पर्शाने कमलिनी मोहरली,
पाकळी नि पाकळी आनंदाने उमलली...
कमलिनीच्‍या मिठीतून भुंगा अलगद सुटला,
झोपेतून जागला,तो गुणगुणायलाच लागला...
अमृताच्‍या गोडव्‍याने झालो वेडापिसा,
कमलिनीच्‍या मिठीतून सुटलो कसाबसा...
भुंग्‍याची गुणगुण कमलिनीच्‍या कानी गेली,
रातीचे स्‍वप्‍न, ती पुन्‍हा आठवू लागली...
कोण आला,कोण गेला,तिच्‍या नाही गावी,
कमलिनीच्‍या मनी-मानसी राज्‍य करी रवी...

पाचोळा

2007-01-29T02:09:00.000-08:00

सांज सकाळ,वेळ अवेळ
बासरी सूरवेल्‍हाळ.....

सूर मधाळ, भाव तरल,
कान्‍हा मनवेल्‍हाळ.....

वाट ओढाळ,चित्त नाठाळ
पावले रक्‍तबंबाळ.....

राधा विव्‍हल,नेत्र बोझल
मेघ घनश्‍यामल.....

पाचोळा

2007-01-29T02:04:00.000-08:00

काळी वेदना
सावलीत लपली
उजाडल्‍यावर....

डोळ्‍यातलं पाणी
खेळायला गेलं
दवाबरोबर....

फुलांचे नि:श्‍वास
उडून गेले
मारताच फुंकर....

सुगंधाची कुपी
दूरवर उधळली,
हसण्‍याबरोबर....

पाचोळा

2007-01-28T10:27:00.000-08:00

देवाच्‍या पायावर
फुलांची लयलूट,
वेलीपासून ताटातूट....

पाचोळा

2007-01-28T10:23:00.000-08:00

टाकीच्‍या घणांनी
घडली मूर्ती..
देवाची आरती....

पाचोळा

2007-01-28T09:56:00.000-08:00

रेतीवर तुझ्‍या माझ्‍या
पावलांची नक्षी,
क्षितिजाच्‍या पल्‍याड उडणारे
आठवणींचे पक्षी....
काळ तयारच असतो
पावलांची नक्षी बुजवायला....
इतका वेळ का लागतो मग,
मनाच्‍या जखमा बुजायला??