अंगाई...

आनंदाच्या गं झाडाला,
नवी फुटली डहाळी,
तिच्यावर उमलली,
रूपकळी...


गोरुली, गोडुली,
माया-स्नेहाने माखली,
नजरेच्या पाळण्यात,
विसावली...


बघता-बघता,
सई हसाया लागली,
गालावर उमटली,
गोड खळी...


इवलीशी झोळी,
फुलां-फुग्यांनी सजली,
तिच्यामध्ये विसावली,
सोनकळी...

उगवली सांजवेळी,
साजरीशी दीपकळी,
भरो साऱ्यांचीच झोळी,
प्रकाशाने...


किती किती बोलवाल,
तिला छकुली, सोनुली,
नाव द्या ना छानदार,
शुभ वेळी...

आता यावे गं आत्याने,
नाव कानात सांगावे,
शुभ आशीर्वच द्यावे,
पणजीने.....